नालासोपाऱ्यात भाजी व्यापाऱ्याच्या घरावर जमावाचा हल्ला

स्थलांतरितांना गावी जाण्यासाठी भरावा लागणारा ऑनलाइन फॉर्म भरून न दिल्याच्या कारणावरून नालासोपाऱ्यात एका भाजी व्यापाऱ्याच्या घरावर जमावानं दगड, विटांनी हल्ला केल्याची घटना घडली आहे. या प्रकरणी ३० ते ३२ जणांविरुद्ध गुन्हा दाखल करण्यात आला आहे.

ठाणे

: गावी जाण्यासाठी ऑनलाइन फॉर्म भरून न दिल्याच्या कारणावरून नालासोपाऱ्यातील एका भाजी व्यापाऱ्याच्या घरावर जमावानं हल्ला केला आहे. मंगळवारी रात्री ही घटना घडली. लोखंडी रॉड, दगड आणि विटा घेऊन जमावानं व्यापाऱ्याच्या घराला लक्ष्य केलं. या हल्ल्यात सहा वर्षांच्या मुलासह दोघे जखमी झाले आहेत.

वसई गाव पोलिसांनी या प्रकरणी ३० ते ३२ जणांवर गुन्हा दाखल केला आहे. यात नालासोपारापश्चिमेकडच्या कळम गावातील काही लोक आहेत. हल्लेखोरांपैकी १२ जणांची ओळख पटली आहे. तर, इतरांचा शोध सुरू आहे. मात्र, अद्याप कोणालाही अटक करण्यात आलेली नाही.

'रेल्वेनं अद्याप स्थलांतरितांना कुठलीही सवलत दिलेली नाही'

ब्रिजेश चौहान (३०) असं हल्ला झालेल्या भाजी व्यापाऱ्याचं नाव आहे. तो नालासोपारा पश्चिमेकडील निर्मल गावात राहतो. नालासोपाऱ्यातील शेतकऱ्यांकडून भाजी खरेदी करून ती भाजी मुंबईतील भायखळा मार्केटमध्ये विकण्याचा त्याचा व्यवसाय आहे. चौहान हा नालासोपाऱ्यातील भाजी विक्रेत्यांना उत्तर प्रदेशातील त्यांच्या गावी जाण्यासाठी मदत करत होता. त्याचे ऑनलाइन फॉर्म भरून देत होता. सोमवारी रात्री कळम गावातील काही लोक त्यांच्याकडं ऑनलाइन फॉर्म भरून घेण्यासाठी आले होते. त्यांच्यातील काही जणांना महाराष्ट्रातील आपल्या गावी जायचे होते. चौहान यानं त्यांना दुसऱ्या दिवशी, म्हणजेच मंगळवारी येण्यास सांगितले. त्यामुळं लोक संतापले आणि त्याच्याशी शाब्दिक वाद घालून निघून गेले. त्याच रात्री चौहान यानं वसई गाव पोलीस ठाण्यात 'एनसी' दिली.

'दारूसाठी रांगा लावणाऱ्यांचे रेशन कार्ड रद्द करा'

मंगळवारी रात्री चौहान घरी परतण्याआधीच ९ वाजण्याच्या सुमारास त्याला पत्नीचा फोन आला. आपल्या घरासमोर मोठा जमाव जमला असून त्यांनी घरावर दगडफेक केल्याचं, खिडकीच्या काचा तोडल्याचं तिनं ब्रिजेशला सांगितलं. घरातील फर्निचरची नासधूस केल्याचंही तिनं सांगितलं. चौहान यानं लगचेच पोलीस ठाण्यात तक्रार दाखल केली. दगडफेकीत आपली पत्नी व सहा वर्षांचा पुतण्या जखमी झाल्याचं त्यानं तक्रारीत नमूद केलं आहे. या प्रकरणी वेगवेगळ्या कलमांखाली गुन्हे दाखल करण्यात आले आहेत.