CORONA SYMTOMS

लॉकडाऊनमुळे दाणादाण! ४० टक्के पर्यटन कंपन्या बंद होणार

पर्यटन व्यवसायाची करोनामुळे तसेच त्याचा संसर्ग कमी करण्यासाठी जगभरात सुरू असलेल्या लॉकडाउनमुळे दाणादाण उडाली असून, येत्या तीन ते सहा महिन्यांत सुमारे ४० टक्के पर्यटन कंपन्या कायमच्या बंद होण्याच्या मार्गावर आहेत.

वृत्तसंस्था, नवी दिल्ली

पर्यटन व्यवसायाची करोनामुळे तसेच त्याचा संसर्ग कमी करण्यासाठी जगभरात सुरू असलेल्या लॉकडाउनमुळे दाणादाण उडाली असून, येत्या तीन ते सहा महिन्यांत सुमारे ४० टक्के पर्यटन कंपन्या कायमच्या बंद होण्याच्या मार्गावर आहेत. बोट या ट्रॅव्हल सेंटिमेंट ट्रॅकर संस्थेने विविध सात राष्ट्रीय पर्यटन व्यवसाय संघटनांसमवेत यासंदर्भात एक संशोघन केले. त्याचा अहवाल सोमवारी प्रसिद्ध करण्यात आला. त्यामध्ये पर्यटन उद्योगाची दयनीय स्थिती मांडण्यात आली आहे.

बोट ट्रॅव्हल टॅकरने देशातील २,३०० ट्रॅव्हल कंपन्यांना व्यवसायाच्या सद्यस्थितीबाबत प्रश्न विचारले होते. त्यातून मिळालेल्या माहितीच्या आधारे, या उद्योगक्षेत्रातील ३६ टक्के कंपन्या आपला व्यवसाय काही काळासाठी बंद करण्याची शक्यता या अहवालात वर्तवली गेली आहे. करोनामुळे पर्यटन उद्योगाचे खूप नुकसान झाले असून ८१ टक्के कंपन्यांना १०० टक्के महसूलावर पाणी सोडावे लागले आहे, तर १५ टक्के कंपन्यांच्या महसुलात ७५ टक्क्यांपर्यंत घट झाली आहे.

कोविड-१९ (करोना) संसर्गामुळे निर्माण झालेल्या परिस्थितीत पर्यटन उद्योग मोठ्या प्रमाणावर भरडला गेला आहे. करोनाच्या उद्रेकामुळे या उद्योगावर प्रत्यक्षाप्रत्यक्ष अवलंबून असणाऱ्यांचे मोठे नुकसान झाले आहे. मोठ्या प्रमाणावर रोजगारही जाणार आहेत. अनेक पर्यटन कंपन्यांनी नोकरकपातीचा मार्ग न अवलंबता आहे त्या कर्मचारीवर्गाचे वेतन मोठ्या प्रमाणावर कमी करायचे ठरवले आहे. तसेच अनेक कंपन्यांनी वेतन लांबणीवर टाकण्याबरोबरच कर्मचाऱ्यांची कंत्राटे रद्द करण्यासारखे निर्णयही घेतले आहेत.

कंपन्यांच्या अपेक्षा -

- सरकारने टुरिझम रिलिफ फंड तत्काळ तयार करावा, अशी ७८.६ टक्के कंपन्यांची अपेक्षा आहे.

- ६८.२ कंपन्यांनी आरक्षणे रद्द केल्यानंतर मिळणारी रिफंडची रक्कम त्वरित मिळावी, अशी मागणी केली आहे.

- ६७.७ टक्के कंपन्यांनी सध्याचा जीएसटी कमी करावा, अशी मागणी केली आहे.

- ५४.२ टक्के कंपन्या व ४९.३ टक्के व्यावसायिक यांनी कर्जहप्ते १२ महिने लांबणीवक टाकण्याची सरकारने अनुमती द्यावी, असे म्हटले आहे.

कंपन्यांनी केलेल्या तडजोडी -

- ७३ टक्के पर्यटन कंपन्यांनी वेतन कपात, वेतन लांबणीवर टाकणे, कंत्राटे रद्द करणे असे मार्ग निवडले आहेत.

- ६७ टक्के कंपन्यांनी मनुष्यबळावरील खर्चात कपात केली आहे.

- ४९ टक्के कंपन्यांनी आपला भांडवली खर्च लांबणीवर टाकला आहे.

- ४१.६ टक्के कंपन्या या परिस्थितीतही नव्या सेवा देऊ करत आहेत.